लगातार वर्षाको कारण हेटौंडा-काठमाण्डौं जोड्ने सबै सडक अवरुद्ध

असार, हेटौडा – निरन्तर वर्षाको कारण आएको बाढी पहिरोले बागमती प्रदेश राजधानी हेटौंडा र संघिय राजधानी काठमाण्डौ जोड्ने सबै सडक मार्गहरु अवरुद्ध भएको छ । हेटौंडाबाट काठमाण्डौ जोड्ने छोटो सडकमार्ग तीन दिनदेखि बन्द रहेको छ ।

हेटौंडा–भैसे सडक खण्डमा भिमफेदी १ बाघझोरामा, भैसे–भीमफेदी–फाखेल र सिस्नेरी सडक खण्डमा पान्द्राङ, गढी, देराली , ईन्द्रसरोबर महा लक्ष्मीखोला , कुलेखानीमा पहिरो जाँदा सडक अवरुद्ध भएको जिल्ला प्रहरी कार्यलय मकवानपुरले जानकारी दिएको छ ।

यस्तै, कान्तिलोक पथ अन्तर्गतको भिमफेदी ८ कोगटेमा पहिरोले सडकको पिचनै बगाएको प्रहरीले जनाएको छ । कान्तिलोक पथकै ललितपुरको भट्टेडाडामा पनि पहिरो गएर सडक अवरुद्ध छ ।

हेटौंडा काठमाण्डौ जोड्ने पुरानो सडकमार्ग त्रिभुवन राजपथ सडक खण्डको अघोर, थाहा नगरपालिकाको खानीगाउँ, गैरीगाउँमा पहिरोले सडक अवरुद्ध बनाएको छ ।