हेटौंडा उपमहानगरले १० हजार लिटर खानेपानी निशुल्क दिने

साउन, हेटौडा – हेटौंडा उपमहानगरपालिकाले मासिक १० हजार लिटर खानेपानी निशुल्क दिने भएको छ ।

बिहीबार उपमहानगरमा बसेको मेयर मीनाकुमारी लामा, उपमेयर राजेश बानियाँ तथा १९ वटै वडाका अध्यक्षसहित खानेपानी व्यवस्थापन बोर्ड पदाधिकारीको बैठकले नगर क्षेत्रमा बोर्डको धारा जडान भएको २३ हजार ५ सय धाराबाट पानी उपभोग गर्ने उपभोक्ताको लागि मासिक न्यूनतम शुल्क ८५ रुपैँया बराबरको १० हजार लिटर खानेपानी निशुल्क दिने निर्णय गरेको हो ।

उक्त पानी नगरपालिकाका १ लाख ४५ हजार जनसंख्याले सेवा पाउने उपमहानगरपालिकाले गरेको छ । निशुल्क खानेपानी उपलब्ध गराएवापत उपमहानगरले खानेपानी बोर्डलाई वार्षिक २ करोड ३९ लाख ७० हजार रुपैयाँ भुक्तानी गर्ने निर्णय गरिएको छ ।

उपभोक्ता समितिमार्फत खानेपानी प्रयोग गरिएको हकमा भने उपमहानगरपालिकाले कुनै निर्णय गरेको छैन् । उपभोक्ता समितिद्वारा पानी वितरण भएको क्षेत्रको हकमा पछि विशेष निर्णय गरिने हेटौँडा उपमहानगरपालिकाकी मेयर मिना लामाले बताईन्।