आइराकला घ्यालम (ह्वाइखा)
-शितल थोकर तामाङ 
ङादा था मुला बेनान ताम
नागा क्राबा भन्दै ङाच्छा
सिल्बा देन छ्याम रेसि नाम
आब्से फ्रुल्मुबा माघै
ह्याप्मुबा नाख्लेरि
ह्यार्मुबा घट्टरि।
आम्से फुइमुबा मे
जुमुबा हन्डी।
सेम न्होमुबा बाप
न्हाङ्गर रेनु थे जि धोला।
ङादा था मुला बेनान ताम।
दिनि भन्दै ङाच्चा रेसि
आम्से आइराक जुमुबा
सेर गि
सेर नि
सेर सोम
तिन पानी आइराक मिन्मुबा।
थे आइराक उ तोजा गाङ्ला
ह्राङ्लान भट्टि पसल रि बोर्मुबा
खाङ्बा धुइरी
आइराक थुङ्खाबा म्हि गादे
ल्हाना तामुबा।
माना नाङला बोगल गि।
थेरङबन बोगल बोगल जम्म लासी
ङनिदा डोबरी पुइबा हिन्ना।
धात्ते नोन ङा।
ह्राङ्ला घ्लारी
फोटक फोटक बोल्बान मुला
आबा आम्दा तिलै लासी
सुखरी थान्दोला बिबा मुला।
ङा धिमला जामे थेबा।
ङाइ सरकारी जागिर चातोला रो।
तिल्मा जागिरला लागिरी भिडाइदिजी
तिनी ङा जागिरे ताजी।
आबा आमा फुर्ताङ्जी।
ङाइ आइराकला घ्यालम से
ब्राबा धोइरी
ङा घाइमाइ आन्होइजी
बरु ङा न्होइजी
आबा आम्ला दु:खला ह्रे गादेरी।
धारेम निआतो थेनी घट्टरि
धाइ आतो बाप
चुङ आतो आइराक।
तासै नोन
ङाला चु सफलता ला स्वाद
ठ्याक्कन आइराकला ह्राङ्बा मुला
ङाला चु ताङ्बा ह्रेला बास्ना
आबा आम्ला टु ला ह्राङ्बा मुला।
