लेकाली बसिफाँट माविमा थाहा आन्दोलनबारे परिचर्चा हुने
तामसालिङ खबर
मकवानपुर, ३१ जेठ । यही आउँदो असार ७ गते परेको २० औ रुपचन्द्र विष्ट स्मृति दिवसमा भिमफेदी गाउँपालिका वडा नम्बर ९ मा अवस्थित श्री लेकाली बसीफाँट माध्यामिक विद्यालयले असार ६ गते विद्यार्थी, अभिभावक तथा स्थानीयहरुसँग थाहा आन्दोलनबारे चर्चापरिचर्चा गर्ने भएको छ ।स्मृति दिवसलाई मध्यनजर पारेर असार ६ गते सो कार्यक्रम गरिन लागिएको विद्यालय व्यवस्थापन समितिका अध्यक्ष विनोद लामाले जानाकारी दिए ।
शुक्रबार संचारकर्मीहरुसँग कुरा गर्दै अध्यक्ष लामाले रुपचन्द्र विष्ट र उनले चलाएको थाहा आन्दोलनबारे नयाँ पुस्तालाई जानकारी दिने उदेश्य मात्र नभएर थाहा आन्दोलनमा लागेका पुराना पुस्ताहरुसँग पनि थाहाको विषयमा परिचर्चा गरिने बताए । विद्यालयले पहिलो पटक आयोजन ागर्न थालेको परिचर्चाका साथै कविता वाचन कार्यक्रममा करिब दुई दर्जन श्रष्टाहरुले कविता वाचन गर्ने समेत बताइएको छ ।
बसीफाँट माविका प्रधानाध्यापक एल एल मण्डलले विद्यार्थीको सिकाईमा थाहाका दर्शनलाई जोड्ने र समय सान्दर्भिक बनाउने विषयमा आफ्नो धाराणा व्यक्त गरे । कार्यक्रम मुख्यतया विद्यार्थी केन्द्रित हुने बताउँदै मण्डलले लेकाली बसिफाँट मावि विद्यार्थीलाई किताबी ज्ञान केन्द्रित मात्र गराउने पक्षमा नरहेको बताए । थाहा र भिमफेदीलाई जोड्न भूमिका खेलेको बसिफाँटले नयाँ पुस्तालाई रुपचन्द्रको अभियानसँग जोड्ने समेत दाबी गरे ।
विद्यालयका शिक्षक यश लामाले हेटौँडा, काठमाडौँ र थाहा नगरका दुई दर्जन भन्दा बढि स्रष्टाहरुले साहित्य सिर्जनाहरु प्रस्तुत गर्ने कार्यक्रम रहेको जानकारी दिए । लामाले रुपचन्द्रको जीवनी विद्यालयको पाठ्यपुस्तकमा समेत समावेश गर्नुपर्नेमा जोड दिए । विद्यार्थीहरुले वास्तविक रुपमा रुपचन्द्रको बारेमा बुझुन् भन्ने उदेश्य समेत रहेको लामाले बताए । कार्यक्रममा थाहाका अभियान्ता एवम् प्रत्यायोजित समितिका सभापति रामनारायण विडारीको उपस्थिति रहने आयोजकले जानकारी दिएको छ ।
