राक्सिराङले ल्यायो ६५ करोड ३१ लाखको बजेट, पूर्वाधार विकासमा जोड
ताम्सालिङ खबर
असार, हेटौडा (राक्सिराङ्ग) – मकवानपुरको राक्सिराङ गाउँपालिकाले आर्थिक वर्ष २०८३/०८४ का लागि ६५ करोड ३१ लाख ७९ हजार रुपैयाँ बराबरको बजेट सार्वजनिक गरेको छ।
गाउँपालिकाको २०औँ गाउँसभामा उपाध्यक्ष वनस्तम थिङले बजेट प्रस्तुत गर्नुभएको हो। कुल बजेटमध्ये चालुतर्फ ३७ करोड ८६ लाख ७३ हजार रुपैयाँ र पुँजीगततर्फ २७ करोड ४५ लाख ६ हजार रुपैयाँ विनियोजन गरिएको छ।
बजेटमा सुशासन तथा प्रशासन, पूर्वाधार विकास, आर्थिक विकास र सामाजिक विकासलाई प्राथमिकता दिइएको छ। स्रोत व्यवस्थापनतर्फ सङ्घीय सरकारबाट ४६ करोड ८४ लाख २७ हजार, प्रदेश सरकारबाट ८ करोड ६९ लाख ८९ हजार तथा आन्तरिक स्रोतबाट ९ करोड ७७ लाख ६३ हजार रुपैयाँ जुटाइने उल्लेख गरिएको छ।
गाउँपालिका अध्यक्ष राजकुमार मल्लले आगामी आर्थिक वर्षको नीति तथा कार्यक्रम प्रस्तुत गर्दै शिक्षा, स्वास्थ्य, कृषि, पूर्वाधार, विद्युत् र वातावरणलाई विकासको मुख्य आधार बनाइने बताउनुभएको थियो। कृषिमा युवाको सहभागिता बढाउने, चेपाङ समुदायको पोषण सुधार, किशोरी गर्भवती न्यूनीकरण तथा सुत्केरी आमा पोषिलो खाना कार्यक्रमलाई निरन्तरता दिने नीति पनि गाउँपालिकाले अघि सारेको छ।
यो पनि पढ्नुहोस्
